رییس اجراییه کشور به ولایت غور رفت

دوکتور عبدالله عبدالله، رییس اجراییه جمهوری اسلامی افغانستان، در رأس یک هیأت بلندپایۀ دولتی امروز دوشنبه (9 اسد) به منظور بررسی اوضاع امنیتی و ارزیابی حکومت محلی به ولایت غور رفت.

مسوولان و بزرگان ولایت غور در شهر فیروزکوه از رییس اجراییه کشور و هیأت همراهش پذیرایی کردند.

نخست، رییس اجراییه کشور به منظور بررسی و تحلیل و ارزیابی اوضاع امنیتی ولایت غور در نشستی فوق‌العاده شورای نظامی این ولایت را رهبری خواهد کرد.

سپس، در دیدار با والی و مسوولان اداره‌های محلی غور، پروژه‌های توسعه‌یی و حکومت‌داری محلی را در غور ارزیابی خواهد نمود.

در این سفر رییس اجراییه کشور را وزرای معارف، انکشاف دهات، مبارزه با حوادث و معاونان ارگان‌های محل، انرژی و آب، امنیت ملی، رییس دارالانشای شورای وزیران، شماری از نماینده‌گان شورای ملی و مشاوران ریاست اجراییه همراهی می‌کنند.