رییس اجراییه کشور پس از اشتراک در اجلاس سران حکومت‌های سازمان شانگهای به کابل برگشت

دوکتور عبدالله عبدالله، رییس اجراییه افغانستان، پس از اشتراک در اجلاس سران حکومت‌های اعضای سازمان همکاری‌های شانگهای در شهر سوچی روسیه به کابل برگشت.

رییس اجراییه کشور در نشست شانگهای، بر همکاری و مبارزۀ مشترک و موثر کشورهای منطقه و جهان با هراس‌افگنی تأکید ورزید و از قربانی‌ها و مبارزات خسته‌گی‌ناپذیر مردم و نیروهای امنیتی افغانستان در جنگ با گروه‌های تروریستی داخلی، منطقه‌یی و جهانی سخن زد.

دوکتور عبدالله عبدالله، از کشورهای منطقه خواست که به پروسۀ صلح و ثباتِ افغانستان همکاری نموده و کشورهای حامی تروریستان و پناه‌گاه‎‌های آنان را تحت فشار قرار دهند.

رییس اجراییه کشور در حاشیۀ نشست با نخست‌وزیران کشورهای فدراتیف روسیه، جمهوری خلق چین، ازبیکستان، تاجیکستان، قزاقستان، قرغیزستان و دبیرکل سازمان‌ همکاری‌های شانگهای دیدار کرد.

در این ملاقات‌ها، دوکتور عبدالله عبدالله، خواستار حمایت این کشورها از عضویت کامل افغانستان در سازمان شانگهای شد و برهمکاری‌های مشترک سیاسی٬ امنیتی٬ اقتصادی و فرهنگی تاکید نمود.

ریاست امور رسانه‌ها

ریاست اجراییه جمهوری اسلامی افغانستان