رییس اجراییه جمهوری اسلامی افغانستان در یک سفر رسمی دو روزه به دعوت صدراعظم جمهوری تاجیکستان وارد این کشور گردید

جلالتمآب دوکتور عبدالله عبدالله رییس اجراییه جمهوری اسلامی افغانستان جهت اشتراک در کنفرانس بین‌المللی تحت عنوان "آب برای توسعه‌‌ی پایدار" و به دعوت رسمی صدراعظم جمهوری تاجیکستان جلالتمآب قاهر رسول‌زاده در رأس یک هیأت بلندپایۀ دولتی، امروز چهارشنبه، 30 جوزای 1397 وارد شهر دوشنبه گردید.

در این سفر رییس اجراییه کشور، افزون بر سخنرانی در کنفرانس بین‌المللی "آب برای توسعه‌ی پایدار" که هدف آن استفاده خوب و مدیریت آب برای توسعه‌ی پایدار است، با جلالتمآب امام علی رحمان رییس جمهوری، جلالتمآب قاهر رسول‌زاده صدراعظم و رییس پارلمان جمهوری تاجیکستان دیدار و ملاقات می‌کند.

رییس اجراییه کشور در حاشیه این سفر با جلالتمآب رییس جمهوری ترکمنستان، جلالتمأب رییس جمهوری اسلامی پاکستان و تعداد دیگر از مقامات این کشور دیدار می‌کند.

در این سفر موافقتنامه‌‌ی همکاری در عرصه‌ی مخابرات، یادداشت تفاهم همکاری در زمینه‌ی معادن و اعلامیه‌ مشترک میان مقامات جمهوری اسلامی افغانستان و جمهوری تاجیکستان به امضا می‌رسد و هر دو طرف روی گسترش روابط دوجانبه، تقویت همکاری‌های امنیتی، اقتصادی، اجتماعی، فرهنگی، تجارت، ترانزیت و مبارزه مشترک با تروریزم بحث و گفتگو می‌کنند.

در این سفر وزیر امور داخله محترم ویس احمد برمک، وزیر مخابرات محترم شهزادگل آریوبی، معین سیاسی وزارت امور خارجه محترم حکمت خلیل کرزی، معین وزارت انرژی و آب محترم محمد گل خلمی، معین وزارت اقتصاد محترم محمد اسماعیل رحیمی و معین وزارت معدن و پطرولیم محترم میرجاوید سادات جلالتمآب رییس اجراییه کشور را همراهی می‌کنند.

 

ریاست امور رسانه‌های

ریاست اجراییه جمهوری اسلامی افغانستان