رییس اجراییه بعد از یک سفر دو روزه رسمی به جمهوری تاجیکستان دوباره به کابل برگشت

سپیدار-کابل: جلالتمآب دکتور عبدالله عبدالله رییس اجراییه جمهوری اسلامی افغانستان بعد از یک سفر رسمی دو روزه به جمهوری تاجیکستان شام امروز (پنجشنبه ۳۱ جوزای ۱۳۹۷) دو باره مع‌الخیر به کابل برگشت.

رییس اجراییه در این سفر رسمی که به دعوت جلالتمآب رسول قاهرزاده نخست‌وزیر تاجیکستان صورت گرفته بود در روز نخست سفر در همایش بین‌المللی "آب برای توسعه‌‌ی پایدار" به نمایندگی از افغانستان سخنرانی کرد.

در این سفر رییس اجراییه کشور با جلالتمآب امام علی رحمان رییس جمهور، جلالتمآب قاهر رسول‌زاده صدراعظم و آقای شکورجان ظهور اوف رییس مجلس نمایندگان جمهوری تاجیکستان به صورت جداگانه دیدار و گفتگو کرد.

رییس اجراییه کشور در حاشیه‌ی این سفر با جلالتمآب قربانقلی بیردی محمدوف رییس جمهوری ترکمنستان و جلالتمآب ممنون حسین رییس جمهوری اسلامی پاکستان دیدار نمود.

در این سفر موافقتنامه‌‌ی همکاری در عرصه‌ی مخابرات، یادداشت تفاهم همکاری در زمینه‌ی معادن و اعلامیه‌ مشترکی میان مقامات جمهوری اسلامی افغانستان و جمهوری تاجیکستان به امضا رسید و هر دو طرف روی گسترش روابط دوجانبه، تقویت همکاری‌های امنیتی، اقتصادی، اجتماعی، فرهنگی، تجارت، ترانزیت و مبارزه مشترک با تروریزم بحث و گفتگو کردند.

رییس اجراییه در این سفر همچنان در میدان دوستی در پای منار شاه اسماعیل سامانی اکلیل‌گل گذاشت و در آخرین روز سفر خود از بندبرق راغون نیز دیدن نمود.

در میدان هوای بین‌المللی دوشنبه محترم خدایار خدایارزاده وزیر ترانسپورت جمهوری تاجیکستان، محترم نظام‌الدین زاهدی معین وزارت امورخاجه تاجیکستان، محترم زبیدزاده محمدسعید معاون شهرداری دوشنبه، شارژدافیر سفارت جمهوری اسلامی افغانستان در تاجیکستان و دپلومات‌های کشور برای خداحافظی با رییس اجراییه حاضر شدند.

در این سفر وزیر امور داخله محترم ویس احمد برمک، وزیر مخابرات محترم شهزادگل آریوبی، معین سیاسی وزارت امور خارجه محترم حکمت خلیل کرزی، معین وزارت انرژی و آب محترم محمد گل خلمی، معین وزارت اقتصاد محترم محمد اسماعیل رحیمی و معین وزارت معدن و پطرولیم محترم میرجاوید سادات جلالتمآب رییس اجراییه کشور را همراهی می‌کردند.

 

ریاست امور رسانه‌های

ریاست اجراییه جمهوری اسلامی افغانستان