تاجیکستان و افغانستان به همکاری‌های خود ادامه می‌دهند

محترم دکتور عبدالله عبدالله رییس اجراییه جمهوری اسلامی افغانستان بعد از ظهر امروز (سه شنبه ۱۶ دلو ۱۳۹۷) با آقای شرف‌الدین امام سفیر جمهوری تاجیکستان در دفترکارش در قصر سپیدار ملاقات کرد.

در این ملاقات سفیر جمهوری تاجیکستان در باره روابط دوجانبه و همکاری‌های مشترک میان دو کشور برای رییس اجراییه گزارش داد و آمادگی کشورش را در بخش فراهم سازی برق بیش‌تر برای افغانستان ابراز داشت.

رییس اجراییه روابط میان دو کشور را دوستانه خواند و از همکار‌ی‌های تاجیکستان قدردانی کرد. رییس اجراییه ابراز امیدواری نمود که میزان همکاری و دادوستد تجارتی میان دو کشور افزایش یابد.

در این نشست مبارزه با دهشت‌افگنی و راه‌های موثر همکاری مرزی برای جلوگیری از قاچاق مواد مخدر نیز مورد بحث قرار گرفت.