رییس اجراییه کشور برای اشتراک در پنجمین اجلاس سران کشورهای عضو کنفرانس تعامل و اعتمادسازی در آسیا (سیکا) وارد تاجیکستان گردید

سپیدار- کابل: دوکتور عبدالله عبدالله رییس اجراییه جمهوری اسلامی افغانستان، بعد از ظهر امروز (‌جمعه ۲۴ جوزای ۱۳۹۸)، برای اشتراک در در پنجمین اجلاس سران کشورهای عضو کنفرانس تعامل و اعتماد سازی در آسیا (سیکا) وارد دوشنبه پایتخت تاجیکستان گردید.

رییس اجراییه کشور در پنجمین اجلاس سران سیکا به نمایندگی از جمهوری اسلامی افغانستان اشتراک و سخنرانی می‌کند. رییس اجراییه در صحبت‌های خود با حمایت از تلاش‌ها و برنامه‌های سیکا در آسیا، بر همکاری‌های بیش‌تر میان اعضای سازمان، همگرایی منطقه‌یی، مبارزه مشترک با دهشت‌افگنی و زرع، تولید و قاچاق موادمخدر تأکید می‌کند.

دکتور عبدالله عبدالله رییس اجراییه جمهوری اسلامی افغانستان در حاشیه این اجلاس با رووسای جمهور تاجیکستان، جمهوری ترکیه، جمهوری اسلامی ایران، جمهوری قزاقستان، نخست وزیر آذربایجان و تعدادی از رووسای سازمان‌های بین‌المللی دیدار می‌نماید.

اجلاس سران کنفرانس تعامل و اعتماد سازی در آسیا (سیکا) هر چهارسال یک‌بار به اشتراک سران ۲۷ کشور عضو، هشت عضو و سازمان بین‌المللی ناظر برگزار می‌گردد. در اجلاس ۲۰۱۹ که در شهر دوشنبه به میزبانی جمهوری تاجیکستان برگزار می‌گردد، سران دول و حکومت‌های کشورهای عضو و ناظر قضایای مهم منطقه‌یی و بین‌المللی را مورد بحث قرار می‌دهند.

در میدان هوای بین‌المللی شهر دوشنبه معاون صدراعظم، شارژدافیر و دپلومات‌های سفارت جمهوری اسلامی افغانستان مقیم تاجیکستان از رییس اجراییه کشور استقبال کردند.

 

ریاست امور رسانه‌های

ریاست اجرائیه جمهوری اسلامی افغانستان

۲۴ جوزای ۱۳۹۸