تاجیکستان از دوستان و متحدان استراتیژیک افغانستان است

دوکتور عبدالله عبدالله، رییس اجراییه جمهوری اسلامی افغانستان، در حاشیۀ هژدهمین نشست سران حکومت‌های سازمان همکاری‌های شانگهای بعد از ظهر امروز (جمعه، ۱۰ عقرب ۱۳۹۸) با آقای قاهر رسول‌زاده صدراعظم جمهوری تاجیکستان دیدار کرد.

در این دیدار رییس اجراییه روابط میان دو کشور را حسنه خواند و جمهوری تاجیکستان را از دوستان و متحدان استراتیژیک افغانستان خواند. رییس اجراییه در ادامه صحبت‌های خود از همکاری‌های تاجیکستان و توجه جلالتمآب امام علی رحمان رییس جمهور تاجیکستان به افغانستان تشکر و قدردانی کرد.

رییس اجراییه در ادامه صحبت‌های خود در باره برگزاری انتخابات، تلاش‌ها برای صلح و آخرین تحولات کشور برای نخست وزیر تاجیکستان معلومات ارایه کرد.

نخست وزیر تاجیکستان نیز روابط میان دو کشور را حسنه و نیک خواند و تاکید کرد که افغانستان از دوستان و متحدان نزدیک تاجیکستان به شمار می‌رود. وی همچنان افزود که کمیسیون‌ مشترک میان دو کشور به کارها و فعالیت‌های خود ادامه می‌دهد. وی گفت صلح و امنیت در افغانستان برای تاجیکستان از اهمیت فوق‌العاده برخوردار است. ترانزیت، انتقال انرژی و عملی شدن برنامه‌های بزرگ منطقه‌یی چون کاسا یکهزار به امنیت در افغانستان بستگی دارد.

نخست وزیر تاجیکستان همچنان ابراز امیدواری نمود که روابط اقتصادی و تجارتی میان کشور رونق بیش‌تر یابد.