رییس اجراییه افغانستان برای اشتراک در نشست سران حکومت‌های سازمان همکاری‌‌شانگهای راهی ازبیکستان شد

سپیدار- کابل: دوکتور عبدالله عبدالله، رییس اجراییه جمهوری اسلامی افغانستان، امروز (جمعه، ۱۰ عقرب ۱۳۹۸) در رأس یک هیأت بلندپایۀ دولتی به منظور اشتراک در هژدهمین نشست سران حکومت‌های سازمان همکاری‌شانگهای عازم تاشکند پایتخت ازبیکستان گردید.

رییس اجراییه افغانستان در اجلاس سران حکومت‌های سازمان شانگهای به نمایندگی از جمهوری اسلامی افغانستان اشتراک و سخنرانی می‌کند.

رییس اجراییه کشور در حاشیۀ نشست سران حکومت‌های شانگهای با نخست‌وزیران فدراتیف روسیه، جمهوری ازبیکستان، جمهوری قزاقستان، جمهوری قرغیزستان، جمهوری تاجیکستان، معاون اول رییس جمهور ایران، وزیر دفاع هند، سکرترجنرال سازمان همکاری شانگهای و اعضای بلندپایۀ شماری از کشورها ملاقات می‌کند.

در این نشست سران حکومت‌های سازمان همکاری‌های شانگهای در باره تحولات سیاسی-امنیتی منطقه، همکاری‌های اقتصادی، سرمایه‌گذاری‌های مشترک، توسعه، مقابله با دهشت‌افگنی، افراط‌گرایی و چالش‌های مشترک منطقه‌یی بحث و تبادل نظر می‌کنند.

 

ریاست امور رسانه‌ها

ریاست اجراییه جمهوری اسلامی افغانستان