رییس اجراییه با خانوادۀ مولوی حیات‌الدین صاحبی ابراز همدردی و غم‌شریکی کرد

دوکتور عبدالله عبدالله، رییس اجراییه افغانستان، امروز (یک‌شنبه ۵ عقرب ۱۳۹۸) در تماس تلیفونی با مولوی غیاث‌الدین صاحبی از علمای ولایت بلخ، شهادت فرزندش مولوی حیات‌الدین صاحبی را تسلیت گفت.

رییس اجراییه کشور، ترور ناجوان‌مردانۀ مولوی صاحبی را عملی نابخشونی خواند و گفت که عاملان این رویداد تروریستی جداً مورد پی‌گرد قرار خواهند گرفت. دوکتور عبدالله عبدالله افزود که به نهادهای امنیتی هدایت داده شده تا هرچه عاجل عاملان این رویداد تروریستی را شناسایی و به سزای اعمال‌شان برسانند.

رییس اجراییه کشور، مولوی حیات‌الدین صاحبی را از علمای سرشناس و مطرح افغانستان خواند و گفت که گروه‌های تروریستی و جنایت‌کاران نشان داده‌اند که پروای جان عالمان دین، غیرنظامیان بی‌گناه و شهروندان کشور را ندارند.